He mokopuna a Kaiārahi Alfred Warbrick nā Mokonuiarangi o Ngāti Rangitihi.  Nāna hoki te hū o Tarawera i kite i tana hopuni i tū ai i tana whenua.

“Nōku e mātaki ana i te maunga tapu rā e pakaru haere ana i a ia e ruaki nei i te ahi tipua, kotahi noa iho te whakaaro i taku mahara, arā ko taku whaea me ngā tini mate e takoto ana i ngā ana kōiwi kua kore i te pakarutanga o te maunga rā.”

Ka toko ake te whakaaro i a Warbrick kia torona te ringa āwhina, nō reira, i te 14 o Hune, i muri tonu i tāna whakaheke i ētehi poti i tētehi pari paru ki te wai, ka ārahina e ia tana ope tokoiwa kia kitea te parekura nui o Te Ariki me Moura.

Ka tae tuatahi atu ki Moura kia kitea kua waipukehia katoatia te wāhi rā ki te waiparu.  Ka ohorere hoki i te nui o te paru i Te Ariki, heoi, ka haere tonu. Ka hoea tonuhia ngā waka tae noa atu ki te ahiahi rā anō kia kitea noatia kua nunumi kē te pā.

I taua wā tonu rā, i te haere hoki tētehi tira o Ngāti Rangitihi i te takiwā o Rangitaiki mā Rotomahana ka tūtaki ai ki a Warbrick mā i Te Ariki.  I reira ka tangi ngātahi ngā tira e rua i tā rātau i kite ai.

Nā wai, nā wai, ka tonoa a Alfred kia ārahina tētehi tira ki Rotomahana kia kitea te otinga atu o Te Tarata me Ōtūkapuarangi i muri mai i te pahūnga.  Ka heke rāua tahi ko tētehi kaipūrongo mā te taura ki tētehi rua pungatara kia kitea ngā tūāpapa. Ahakoa te uaua o tāna i kite ai, te āhua nei ko Ōtūkapuarangi kei raro i te paru, heoi, nā te mōrearea i mutu ai te tūhuratanga, ā, kua pērā mai i tērā wā ki tēnei rangi tonu nei.

I muri i te pahūtanga, ka hau te rongo o Alfred hei kaiārahi i tana kaha ārahi i te hunga manene ki Tarawera mā te riu o Waimangu.  I te tau 1903, ka toro anō a Hine-nui-te-pō i ōna ringa kūreherehe ki ētehi i te pahūnga o te puia o Waimangu. Ko tētehi o te tokowhā i mate, ko tōna teina, ko Kaiārahi Joseph Warbrick (toki purei whutupōro).

E waru tekau tau te pakeke o Alfred Patchett Warbrick i tana matenga i te tau 1940.  I whai wāhi ia ki ētehi kaupapa nui whakaharahara i te hītōria o Aotearoa.