Aunty BeA

 

Te wahine atawhai i hoki atu ki nga whetu i te rangi i te 6 o Hepetema,

i te tau 2018

-

-

Wellbeing

Home

Te Arawa 

Ngāti Rangitihi, Ngāti Rangiwewehi,

Ngāti Pikiao, Ngāti Whakaue,

Ngāti Te Roro-o-te-Rangi, Ngāti Turipuku

Ngāti Manawa,

Scottish & Fijian Indian

Beatrice Piatarihi Tui Yates (ko Grant tōna ingoa takakau).  I whānau mai ia i te 11 o Hepetema, i te tau 1939, ka mate i te 6 o Hepetema, i te tau 2018.  Nō ngā iwi o Te Arawa, o Ngāti Rangiwewehi, o Ngāti Whakaue, o Ngāti Pikiao, o Ngāti Rangitihi, o Ngāti Manawa, o Kotirana, o Airana me ngā Īniana o Whītī.

 

E te kōkā, e te whaea, e te māreikura, e te putiputi o Te Arawa, moe mai rā i tō moenga roa. Waiho mai āu mahi hei whakaora tonu, hei whakanui tonu, hei pupuri tonu mā mātau, mā ngā uri whakatupu. Ko koe tētehi o ngā manukura i whakapono ki ā mātau kaupapa nei o Ngā Pūmanawa e Waru, ā, i noho hoki koe hai kaitiaki i tō mātou Poari. E kore rawa e wareware i a mātau tō kaha ki te manaaki, ki te āwhina, ki te tautoko, ki te hāpai i ngā tini āhuatanga o tā mātau kaupapa. I whakapono koe ki tēnei o ā mātou whāinga, kia puāwai te whakaaro ki te kohikohi i ngā pūrākau o Te Arawa kia noho hei rauemi i ngā kura o Rotorua, o Te Arawa whānui. Kua puāwai, kua ea, ā, kua ora.  Kia au te moe, Aunty.

 

I arohaina nuitia a Aunty Bea e te tīma o Ngā Pūmanawa e Waru, ā, ka pērāhia mō āke tonu atu.  I waimarie mātau i tana kaha tautoko i tā mātau kaupapa mai i tōna orokohanga ki tōna tau tuatoru i a ia ka tū hei taratī.  I tino harikoa a Aunty Bea i te wā i toko tuatahi ake ai te whakaaro kia whakaritea mai tētehi paetukutuku e kitea ai ngā kōrero o Te Arawa.  Heoi, ka harikoa ake ia i te rongotanga atu ka whai wāhi ngā kōrero nei i ngā kura huri noa e mōhio ai ngā tamariki o Te Arawa ko wai rātau, nō hea hoki rātau.

 

He wahine toa, he kaiako, he kaikōrero paki, he kaituhi, he kaihaka, he kaiwhakaari (arā ko Tina Tuna), he tūao, he Wātene Māori, he hoa rangatira, he whaea, he whaea kēkē, he kuia, he tuahangata e kore rawa e tawhiti atu i ngā whakaaro o te tini, tae noa atu ki ana kōrero e mārama pū ai te tini ki tōna hirahiratanga.  Tēnā rawa atu koe, e whae, i mārama te kitea ‘ko koe tonu te tino!’

 

Ngā manaakitanga, nā ngā taratī, nā ngā kaitohutohu me ngā kaimahi o Ngā Pumanawa e Waru.

Qualities: identity, diligence, relationships, innovation, wellbeing, scholarship, humility, values