He nui te arohaina o Tākuta Don Stafford i tana mārama me tana ngākaunui ki te iwi o Te Arawa.  Ka haikai a Don i a ia e tamariki tonu ana i te taenga atu o ngā kaumatua o tērā wā ki te toa a tana matua.  I reira ia i ako ai i ngā kōrero mō te iwi Māori o tuawhakarere, he rōreka ki te taringa, he pārekareka ki te ngākau.

I whakanuia te kupu kōrero a Tākuta Stafford e te tini, ka mutu, nā tōna āheinga ki te kōrero Māori i whai mana ai te koroua Pākehā nei i te ao Māori.  I hau hoki tana rongo i ērā pūkenga kōrero me tōna mātauranga huri noa i Rotorua, i te motu, i te ao whānui hoki.

I whakarewaina e Tākuta Stafford tētehi pukapuka whakahirahira e kīia nei te ingoa ko ‘Te Arawa: A History of the Arawa People’ i te tau 1967.  He rite tonu te whakamahia o tēnei pukapuka nei hei puka kaikohi.  He mea rangahau e Tākuta Stafford te nuinga o ngā kaupapa i tēnei pae tukutuku.  Ahakoa tonu te whakahē a ētehi i ngā kōrero i tuhia rā e Tākuta Stafford, hei tāna, koirā tonu te whakaoranga o ngā kōrero i te nui o te kōrerohia o ērā kōrero.

Atu i tērā pukapuka whakahirahira, rua tekau mā rua atu anō ngā pukapuka i tuhi ai ia e pā ana ki te rohe o Rotorua.  Nō reira, hei tohu whakanui i āna mahi whakapau kaha i ngā tau, e rua kē ngā tohu i whiwhi ai ia i te Kāwanatanga, arā, ko Te Tohu Toihau MBE hei mema o te kāhui rā i te tau 1982 me Te Tohu Toihau CBE hei toihau o te kāhui i te tau 1993.  Hei āpiti atu hoki, i te tau 1993, nā Te Whare Wānanga o Waikato ia i whakawhiwhia ai ki te Tohu Kairangi Hōnore. He tohu mātauranga whakahirahira tērā ka whakawhiwhia ki te tangata kua eke ki ngā taumata tiketike o tāna anō kaupapa.  

Nā te hōhonu o tōna mātauranga i riro ai i a ia te tūranga o te kaitiaki tuatahi o Te Whare Taonga o Te Arawa i te tau 1968.  E kitea tonuhia ana ētehi o ana kōrero tuku iho i kohinga whakaahua o Te Whare Taonga o Te Arawa nāna tonu nei i whakarite.

He mea whakatuwhera tētehi wāhanga hou o te Whare Kaukau i te tau 2011 ka tapaina ai ki te Don Stafford Wing hei tohu whakamaharatanga ki a ia.  I whai wāhi a Tākuta Stafford ki ngā whakaritenga o tērā wāhanga o te Whare Taonga, ā, ahakoa tana pīrangi kia tae ā-tinana atu ia ki taua whakatuwheratanga rā, auare ake.  Ka mate a koroua i te marama o Apireira, i te tau 2010. Ahakoa te pōuri o ngā kaimahi o Te Whare Taonga, i harikoa tonu rātau i tō rātau mōhio ka maumaharatia tonutia a Tākuta Stafford i tana whakaheke werawera kia ora ngā kōrero o Te Arawa i te rohe o Rotorua.

I te tau 2010, nā Mauriora Kingi ōna whakaaro i whakapuaki mō Tākuta Stafford.  Hei tāna “He whare pukapuka a Stafford e kī ana i ngā kōrero mō Te Arawa, ko ia tērā, ko te tuahangata Pākehā o Te Arawa”.