He atua a Pūhaorangi nō te rangi.  Ka mate ia i te aroha ki tētehi wahine ātaahua o runga i te whenua e kīia nei tōna ingoa ko Te Kuraimonoa.  Heke ai a Pūhaorangi i ngā pō e pātata ai ia ki te wahine ātaahua rā.

Ka pōhēhē a Te Kuraimonoa ko tana tāne kē i tōna taha i ngā pō, heoi, auare ake, nā wai rā ka mōhio ko Pūhaorangi kē.  Ka hapū a Te Kuraimonoa, ā, ka puta te kōrero i a Pūhaorangi, “Ki te whānau mai he tama, ā tēnā, tapaia ia ki a Ohomairangi”.

Ka whānau mai he tama, nō reira, ka whāia tonuhia te tohutohu a Pūhaorangi kia tapaia ia ki a Ohomairangi.  Koia rā ko te tupuna whakahirahira e heke nei ngā uri o Te Arawa e kīia nei ko Te Heketanga-a-Rangi i a Pūhaorangi rā anō.

He rite tonu te kōrerohia o Te Heketanga-a-Rangi e ngā koeke o Te Arawa.  Ko ngā uri e heke nei i te kāwai atua o ngā rangi e whakanui hoki nei i a Ohomairangi.  Ko Ngāti Ohomairangi te ingoa o te iwi o runga i te waka o Te Arawa i ārahina ai e Tamatekatekapua.