I

Rakeiao me ona kapowai

Rakeiao and his dragonflies

Ngāti Rongomai

Wellbeing

Home

Ka moe a Rangitihi i a Manawakotokoto ka puta ko tā rāua mātāmua, ko Rākeiao.  He rangatira, he toa, waihoki, i hau tana rongo i te korenga ōna i hinga i te pakanga.
I tana tuaititanga, ka noho a Rākeiao ki te pā o Te Koutu, i Ōkataina.  Ko Te Koutu te wāhi i kitea tuatahihia ai ngā kapowai, ā, i reira ka whai hononga, he hononga mau roa, he pērā i te taukaea e kore rawa e tāwekoweko i noho pūmau ai rātau ki a Rākeiao hei kaitiaki toa mō āke tonu atu.
E ai ki te kōrero, he momo te kapowai e noho motuhake ana ki te moana o Te Rotoiti me ngā wāhi e tata ana.
Ka pakeke haere a Rākeiao, ka whai toa tauā hei ārahi māna.  Ka karangahia hoki ana kapowai ki te āwhina i a ia i te wā o te pakanga.
Ka tae tini mano atu ngā kapowai ki a Rākeiao i te kauhanga riri ka rere ai ki ngā karu, ki ngā taringa, otirā, ki ngā kanohi o te hoa riri i ngana ki te patu i a Rākeiao.  Kīhai a Rākeiao i hinga i te pakanga inā rā kīhai i taea i te maha o ana kaitiaki toa i tae ki te āwhina i tō rātau rangatira. 
E kitea tonuhia ana te kapowai i ēnei rangi mohoa nei.  Me he kaupapa nui e whakahaerehia ana i te marae, ka tae hoki te kapowai.  Kia tae ngā kapowai ki te marae, ko ngā kaumātaua anake ka kōrero ki a rātau ki te whakamōhio atu kei te pai ngā mea katoa.
Heoi anō, kia kitea te kapowai e rere tāhuna noa ana, he tohu tērā kia pātai atu mō te take o tā rātau taenga atu.  Kei te tika rānei tā te ope manuhiri tae atu ki te marae, he kaupapa muna rānei tā rātau? Kei te pai, kua raru rānei ētehi o ngā uri whakaheke a Rākeiao?
E ai ki te kōrero, i tū te puehu i tētehi hui i roto i te wharenui o Rākeiao.  Ka tae ngā kapowai ki te mahau, nō reira, ka hui kē rātau ki waho e tū ai ngā mahuhiri ki mua tonu i ngā kapowai.  Kātahi te kōrero ka puta, “Ka ea tēnei hui i runga i te tika, i te pono!”
I te toru tekau miniti noa ka tau te hui, ā, ka nunumi atu ngā kapowai.
 
Koia nei te hononga o ngā uri whakaheke a Rākeiao me ana kapowai prirpono.

He mea tuhi ngā kupu a Tā Toby Curtis e Cian Elyse White.

Translated by Anaha Hiini

Qualities: humility, relationships, values

Did you know?

Kapokapowai are the largest dragonflies in New Zealand and can have a wingspan of up to 130mm!