Te RORO-O-TE-RANGI & TE Kurauhirangi

Ngāti Whakaue,

Ngāti Te Roro-o-te-Rangi

Wellbeing

Home

Ko Te Roro-o-te-rangi tētehi rangatira o Ngāti Whakaue.  He tama hoki ia nā te rangatira mana nui, nā Ariariterangi.  I te wā i kōhurutia ai a Ariariterangi e Ngāi Te Rangi, ka whakarite a Te Roro-o-te-rangi ki te ngaki i te mate o tōna matua.
 
Ka whakaritea tētehi ope tauā ka whakatika atu ai ki Maketū ki te kōkiri i te hoariri.  He mohoao te ope a Te Roro-o-te-rangi, ka mutu, te āhua nei ka riro i a rātau te tāhuna.  Ahakoa te wheoro o te pakanga i rangona whānuihia ai, he mea rongo hoki te auē a tētehi wahine e kīia nei tōna ingoa ko Te Kurauhirangi.  I te poroporoaki noa ia ki āna tamariki, he mōhio nōna ka mate rātau i te pakanga rā. Nā te auhi o roto i piki ai a Te Kurauhirangi ki te kōtihi o te pā ki te tīwaha atu e tino rongo ai a Te Roro-o-te-rangi i tāna tono kia whaiwhakaarohia te pā e ora tonu ai rātau.
 
I rongo a Te Roro-o-te-rangi i tā Te Kurauhirangi i tono ai, ā, i whakaae kia mutu te whawhai.  Kāore tonu a Te Kurauhirangi i tino mōhio mehemea ka whakarongo rānei ngā toa ki te kupu a Te Roro-o-te-rangi, heoi, i taurangi atu a Te Roro-o-te-rangi kia whakanuia te tono a Te Kurauhirangi, ā, ka tau te pakanga ki reira.
 
He mea takoha ētehi taonga e Te Kurauhirangi i te whaiwhakaaro nui a Te Roro-o-te-rangi.  He ātaahua aua taonga rā. He tahā i whakarākeihia ki ngā huruhuru toroa, he whāriki i rarangahia ki ngā rau kahakaha me tētehi pounamu i tapaia ai ki te inoga o Kaitangata.
 
I muri mai, ko te tatau pounamu te otinga atu i tau ai te puehu i a Ngāti Whakaue me Ngāi Te Rangi.  He mea hoatu ngā taonga ki iwi kē atu nāna tonu nei a Te Roro-o-te-rangi i āwhina ki te ngaki i te mate o tōna matua, heoi, kotahi anake te taonga i puritia tonutia, arā, ko Kaitangata.
 
Heoi anō, i muri mai ka patua a Te Roro-o-te-rangi e Tamamutu, rangatira o te moana, o Taupō, i te korenga o Te Roro-o-te-rangi i tuku koha ki a Tamamutu ahakoa tā Tamamutu takoha i tētehi whāriki ki a ia.
 
E mea ana a Te Roro-o-te-rangi ki te tuku koha ki a Tamamutu hei whakanui i tāna takoha i taua whāriki rā, engari, nā te taenga wawenga atu a Tamamutu ki Mokoia ki te tono it ū ai ngā pihi, i kore ai hoki i tuku koha.
 
Ka tū te puehu, ka tunua, ka kaingia hoki a Te Roro-o-te-rangi e Tamamutu mā.  E ai ki te kōrero, he mea whakairi tana upoko i tētehi rākau kōwhai. Whai muri tonu iho, ka unuhia e Tamamutu te taonga i mau ai a Te Roro-o-te-rangi hei taonga mōna, ā, ka ea i reira.
 
I hau te rongo o Te Roro-o-te-rangi i tana toa, i tana, kaha, i tana māia me tana rangatiratanga, ka mutu, e kore rawa e wareware tana kōrero i whakahua ai ia ki ana toa i te kauhanga riri o Tāwharakurupēti e tū kaha ai rātau i te wā o te whawhai.

Qualities humility, relationships

More to watch:

https://www.nzonscreen.com/title/kairakau-episode-one-2016/quotes

More to read:

Tikanga Māori: Living by Māori Values (Sidney M. Mead)

More to listen to:

https://www.radionz.co.nz/national/programmes/teahikaa/audio/20175143/whakatauaki-mo-19-o-paenga-whawha-april-2015

 
This entry is related to these other entries:

Tawharakurupeti: A mighty battle

 
Sources:

Te Arawa: A History of the Arawa People (D.M. Stafford)