I ngā rā o tuawhakarere, ko Te Tūāhu-a-te-Atua i te tihi o Ngongotahā te kāinga o tētehi iwi porehu.  E ai ki te kōrero, he iwi ira atua i mau ai i a rātau te mana atua, ka mutu, i mōhio whānuihia te iwi rā e kīia nei ko te Patupaiarehe.

He tokoiti noa iho ngā tāngata i kite i te Patupaiarehe i tā rātau noho ki runga rawa rā.  Heoi, he maha ngā whakamāramatanga rerekē i puta ai i ngā waha o te hunga tokoiti i waimarie ki te kite i a rātau.  Hei tā ētehi, he kiritea, hei tā ētehi atu he kiri pūwhero, he urukehu hoki.  He pango te tae o ngā karu o ētehi, he kikorangi te tae o ngā karu o ētehi.

He iwi rangimārie, ehara noa iho i te iwi whawhai, ehara hoki i te pukuriri.

Ahakoa tā rātau noho ki te tihi o te maunga, i ētehi wā ka heke rātau ki te moana o Rotorua ki te mahi īnanga, ki te tiki wai hoki i te korenga o tētehi puna wai e tata ana ki tō rātau pā.  Nā ngā wāhine o te iwi Patupaiarehe te wai i tiki i tētehi puna i raro tonu i ngā pari o te taha raki, i te taha tonu o Kauae, te urupā tapu o Ngāti Whakaue.  Koirā te wā tuatahi i tūpono ai a Ihenga ki te wahine Patupaiarehe i a ia e whakakī ana i tāna tahā ki te wai hei whakahoki māna ki tōna kāinga.

Tae rawa ake a Ihenga ki ngā tahataha o te awa ka kitea te auahi e rewa ake ana ki runga rā e māhirahira ai ia kia pikingia te maunga kia kitea atu ko wai, he aha rānei e noho ana ki runga i te maunga rā.  Hei tā ētehi, ehara noa iho i te auahi, engari, he kohu Patupaiarehe kē.  Heoi anō, ka uru a Ihenga ki te wao nui o te maunga, ā, ka tīmata tana piki haere ki runga. Ka hiainu a Ihenga, heoi, ahakoa tana kaha kimi i tētehi puna, auare ake, kīhai i paku kitea tētehi.  Nō reira, ka piki haere tonu a Ihenga kia tae rā anō ia ki tētehi wāhi mīharo rawa atu, otirā, ko te pā o ngā Patupaiarehe.

Nā, ka kitea atu tētehi wahine ātaahua o te iwi Patupaiarehe, ā, ka hoatu ia i tana tahā wai ki a Ihenga hei inu māna.  I tino aro atu te iwi Patupaiarehe ki a ia nā te mea kāore anō rātau i tino waia ki te momo pēnei i a Ihenga, he rerekē te āhua, he rerekē te tae o te kiri me ngā makawe, he mangumangu, he aha kē atu rānei, ā, ka tīmata ki te patapatai.  Nā reira i māharahara ai a Ihenga i te korenga ōna i mōhio ki ō rātau hiahia.   Ākene pea i pīrangi ki te patu i a ia hei kai mā rātau, nō reira, me pēhea hoki e kore ai ka pūrere atu ia ki raro, ki te pūtake o te maunga i te wā tere rawa atu ka taea. 

Ka whāia a Ihenga e te iwi Patupaiarehe, heoi, he pōturi rawa nō te oma a te nuinga i kore ai a Ihenga e mau.  Hāunga rā tētehi, arā, ko te wahine nāna tonu nei te tahā wai i hoatu ki a Ihenga.  He hiahia nōna ki a Ihenga i unuhia katoatia ai ōna kākahu e tere ake ai tana oma kia mau a Ihenga i a ia hei tāne māna.  I māharahara a Ihenga nā te mea mehemea ka mau kāore pea ia e kite anō i tāna ake wahine.

I taua wā tonu rā ka toko ake te whakaaro i a Ihenga kia pania katoatia tana kiri ki te kōkōwai i tana pūtea i kawe ai ia e mutu ai tā te wahine Patupaiarehe whai i a ia i te haunga o te kōkōwai, ā, ananā!  I tutuki.  Ka tahuri atu te wahine rā, ā, ka hoki ake ia ki runga e wātea ai a Ihenga ki te hoki atu ki tana wahine e tatari nei ki te taha moana o Rotorua.