Nā ngā rangatira o Ngāti Whakaue, arā, nā Te Roro-o-te-rangi rātau ko ōna teina, ko Tūnohopū, ko Te Kata tā rātau ope tauā i ārahi ki te kauhanga o te riri i tū ai ki Tāwharakurupeti.  Ka tū rātau ki tētehi ururua e kitea ai te ope hoariri e whakatata mai ana i te tonga.

Kātahi a Ngāti Whakaue ka kite i te tokomaha o Ngāti Tūwharetoa i tae takitini mai e mōhio ai rātau ka hinga rātau i a Ngāti Tūwharetoa.  Nā Te Roro-o-te-rangi tonu ana toa i whakakipakipa ki āna kupu akiaki e maumaharatia tonuhia ana e ngā uri:

Ruia taitea, ruia taitea, kia tū ko taikākā, ko ahau anake.

He whakataukī e tohu ana kia ruia te wāhanga ngoikore o te rākau kia waiho noa ai ko te wāhanga kaha rawa atu o te rākau anake kia tū.  Ko te whakamāoritanga o tēnei kōrero e tohu ana kia wehe te hunga mataku e waiho noa ai ko te hunga kaha anake ki te whawhai i te whawhai nui.  

Ko te patunga o Te Roro-o-te-rangi, o Te Kata me te rahinga o te ope te otinga atu.  Engari anō a Tūnohopū, i whawhai ia mō te hemo tonu atu kia pō noa te ao i whakaaweawehia ai te ope hoariri i whakaaehia hoki ai ia kia ora tonu ia.